Mate Kowheori

 Tēnā koutou katoa

Kua tae mātou ki te whakakapinga o te wiki tuarua nei, ā, kua reri ngētehi o mātou ki te hoki ki te kura. Ahakoa ngā hua pai o te noho rāhui ki te kāinga, kotahi te tōmina nui a ngā tamariki; ki te tākaro tahi ki ō rātou hoa kanohi-ki-te-kanohi. Ka kite ai rātou i a rātou anō i ngā hui ataata, engari kārekau he rerekē te kite-ā-matihiko i te kite-ā-tinana.

Ka aroha ahau ki ngā ākonga i Tāmaki Makaurau, ā, ka tuku whakaaro mātou ki a rātou e noho rāhui tonu ana.

Hei whakakapinga i tēnei

whakairinga poto, ka tuku wero ahau ki āku ākonga. I te wā ka hoki mātou ki te kura, waihangatia tētehi hotaka mō te rā ka hoki atu mātou.

Noho ora mai i raro i ngā tauwhirotanga o te Runga Rawa.

                                                       

Ko te whakakapinga o te wāhanga tuatoru

 Tēnā koutou katoa

Kua mutu te wāhanga tuatoru o te tau nei, ā, ka anga whakamua mātou ki te wāhanga whakamutunga.

 Ia wāhanga tuawhā, ka tū ai te whakaari matua o te kura. Ko te kaupapa matua o te whakaari i te tau nei, ko Tamainupō. 

Ka whatu ai mātou i te mahi whakaari, te waiata, te waiata-ā-ringa, te pao me te kanikani hei whakaatu i te kaupapa o Tamainupō. Tārewa ake te wā, ka kite ai koutou i ngā whakairinga a ngā tamariki e hāpai ana, e whakatairanga ana i te kaupapa nui whakaharahara nei.

Powtoons

Tēnā koutou katoa Hei te wiki nei, i toro atu ngā tamariki ki tētehi taupānga / hōtaka hou, arā, ko Powtoons tērā. He mahi rerekē tēnei ki te hanga tāoreore, ā, i ako ai rātou ka pēwhea te tūhono i te kitenga (sight), te oro (sound) me te nekehanga (motion).

Pick-a-path Ata Kūkara

Tēnā koutou katoa 

Hei tēnei wiki, he hiahia nōku ki te whakaatu i tētehi tauira Pick-a-path i oti i a Mackenzie. I ahau e whakarite ana i taku Pick-a-path tuatahi, he mahi nui tērā. Ehake tēnei ngohe i te ngohe māmā. Nō reira, me mihi ka tika ki a Mackenzie rātou ko ngā ākonga i akongia ngēnei pūkenga i te wā o te noho rāhui.

 

Pae Mataara 2 - Kua Hoki Mātou ki te Kura

Tēnā koutou katoa I tēnei wā i te tau 2020, he ringa raupā ahau mō taku iwi. Heoi anō, koia nei te wā tuatahi i whakaako ahau i aku ākonga ā-matihiko nei. E toru ngā wiki i noho rāhui ai mātou ki ō mātou kāinga. He wheako hou te whakaako ā-matihiko, ā, nōku te maringanui ki te ako i ngā pūkenga hei whakaako-ā-matihiko i Te Kura Amorangi o Whakawātea. Anei tētehi ngohe i whakaritea e ngētehi ākonga i te wā o te noho rāhui. I whakaako ngēnei ākonga i te kura katoa i te wā i hoki atu mātou katoa ki te kura. Nei te mihi uruhau ki a Riley rātou ko Thando, ko Clayton.

Lockdown 2021

 Tēnā koutou katoa

Kāre i roa ka hoki atu tātou katoa ki te taumata 4 mō te noho ki te kāinga, arā, ko te lockdown tērā. I a tātou e whakareri ana mō te noho ki te kāinga, kua tuhia tētehi pānui ki ngā ākonga i runga i tō mātou paenga Kūkara.

Nō tātou katoa te whiwhi i te mea e āhei ana ngā ākonga ki te ako tonu i te kāinga. Heoi anō rā, he inoi tēnei kia tiaki tātou i a tātou anō.

Mauriora ki a tātou.

Ko Te Wiki Tuatoru o te Wāhanga Nei

 Tēnā koutou katoa

Hei te wiki nei, i whakapakari haere ngā tamariki ki te tautohe i ngā kaupapa rerekē rawa atu. I te nuinga o te wā, i eke panuku ngā kōtiro, engari i te Rāpare he ōrite ngā tīma e rua nā te pai o ngā kōrero o ngā tīma e rua.  Ko te kaupapa tautohetohe e whēnei ana: He pai ake ngā tama i ngā kōtiro ki te tākaro hākinakina. Kātahi te tautohetohe pai ko tērā!

I te tīmatatanga o te wāhanga nei, i pātai ahau ki ahau anō, "I mārama ngēnei tamariki ki te puūtake o te tautohetohe? I taua wā, kīhai rātou i te mōhio ki te pūtake, engari, kua mōhio kē rātou ināīanei. Ka wani kē koutou ngā ākonga i tū ki te tautohetohe!

Te Wiki Tuarua o te Wāhanga Tuatoru ki Whakawātea

Tēna koutou katoa

I ahatia e mātou i te wiki nei?

Hei te wiki nei , i tīmata ai ngā ākonga ki te ruku i te puna o te mātauranga e pā ana ki te mana whenua o Ngāti Māhanga. I waia ngā ākonga ki te whakamahi i ngā Ata Kūkara, heoi anō, i whēnei te āhua o te Ata Kūkara.

I ako ai rātou i tētehi pepeha nō Ngāti Māhanga, ā, e ako tonu ana rātou ki te whakamahi i te taupānga Māhere Kūkara.

Hei ngā wiki e tū mai ana ka ngana ngā ākonga ki te whakawhānui i ō rātou mātauranga e pā ana ki Ngāti Māhanga. Nō reira, hokihoki mai ki konei kia kite ai koe i ngā mahi o ngā ākonga.

Te Wiki Tuatahi o te Wāhanga Tuatoru ki Whakawātea

Tēnā koutou katoa

Kua hoki mai ngā ākonga ki te kura, ā, ka ngangaro ki te kite i a rātou e kai ana i te mātauranga o te wiki tuatahi nei. 

He aha te miramira o te wiki nei?

I te tīmatanga o te wiki nei, i whakarite ai ngā ākonga ki te tunu kai i te Rāmere kua hipa atu. I ako ai rātou ki te tuhi i te tohutaka i te wāhanga tuarua, ā, nō rātou te hiahia kia tunu kai hei whakakapi i ngā akoranga o te wāhanga rua. Nā te reka o ngā kai i tunua e rātou, nō rātou anō te hiahia kia hanga i tētehi pukapuka hei tohatoha ki tō rātou whānau.

CAKE POPS

Source:"Cake Pops" by superscheeli 

PAREHE

Source: "Hawaiian Pizza" by Herman Saksono 

KEKE TIAKARETE TAHEPUIA

                                                Source: "LAVA CAKE!" by Debs (ò‿ó)♪ i

Nau piki mai, nau kake mai te wiki tuarua!

DFI Kirikiriroa - Te Rā Tuaiwa - 23/07/2021

Tēnā koutou katoa

Kua tae mai au ki te pōhi whakamutunga mō ngā DFI; engari, ehake tēnei i te pōhi whakamutunga! Hei whakarewa ake i te pōhi nei, ka tuku aumihi ki ngā kaihautū o te rangi nei. Ko koe tērā Matua Dave, ko koe hoki tērā Whaea Maria. Nā kōrua mātou i whakatau i tō mātou wairua i a mātou e whakareri ana ki te tīmata i te whakamātautau Kūkara. Kāore e kore, e wiriwiri ana ō mātou turi. Heoi anō, ahakoa ko wai ka hinga, ko wai ka toa i te whakamātautau Kūkara nei, kua eke panuku, kua eke Tangaroa mātou i roto i tō mātou akomanga.

Mō ngā rā o anamata, ka ora tonu taku Rangitaki hei wāhi tuku i ngā whakaaro me ngā kare-ā-roto o ia te wiki. E hia kē nei te nui o ngā akoranga mōku i te tau nei. Engari, ko te tino hua mō mātou katoa i te kura nei, ko te whakawhanaungatanga me te tūtaki i ngā kaihautū o Manaiakalani.  Kārekau he kupu hei whakatinana i te whānui me te whāroa o ngā mihi mutunga kore. Kua riro mai māku, mā ōku ākonga hoki ngēnei rawa kāmehameha o Manaiakalani. Ko te Ako, te Hanga me te Tohatoha te kaupapa nui. 

Hei whakakapi i te pōhi nei, me mihi ahau ki tōku rangatira, tōku tumuaki, te wahine mareikura o te kura nei. Nōna te moemoeā nō mai rā anō kia noho ai te kura nei i raro i ngā akoranga o Manaiakalani. Heoi anō, e te whaea, nei te reo karamihi, nei hoki te reo hei whakamānawa i a koe.

Hou, Paimārire.

Auē! I wareware i ahau tētehi mea...

DFI Kirikiriroa - Te Rā Tuawaru - 22/07/2021

Tēnā koutou katoa

Kua tae ake mātou ki te wānanga tuawaru, arā ko te DFI #8. E kore rawa te puna a Mihi e mimiti ki a koutou te pae whakaako o Manaiakalani. Ko te nui a Rawa kua horahia mā mātou, he taonga mā mātou te pae whakaako, heoi anō, he taonga motuhake mō ā mātou ākonga. Nei te mihi, nei te mihi, nei te mihi!

What did I learn that increased my understanding of Manaiakalani kaupapa and pedagogy?

Empower = Whakamana

Ko te hua i puta mai i te rangi nei ko te whakamana i ngā ākonga ki te whiriwhiri i tā rātou e hiahia ai.  Ahakoa ngā piki me ngā heke o ia rangi, ko te mea nui kia whārikihia ngā rawa mā rātou hei tipako. Ko te wero māku, kia kaua e whaiti ngā momo rawa, engari kia whānui kē ngā rawa mā ngā ākonga.

What did I learn that could improve my confidence, capability or workflow as a professional?

Ko tētehi o ngā rawa māku ko te tutu i ngā taupānga tuhi waehere e rua. Ki taku nei whakapae, ka rata mai ngā ākonga ki ngēnei tūmomo ngohe i te mea e kaingākau ana ki a rātou katoa te tākaro kēmu. Heoi anō rā, he pai ake ngēnei kēmu i te mea me waihanga ngā ākonga i tā rātou kēmu i te tuatahi.  Ka hoki aku nei mahara ki tētehi kōrero i ngā rangi kua taha ake nei, arā, he pai ake kia 'whakawhanake/develop' ngā ākonga i ngā kēmu; ehake i te tākaro noa hei 'kaiwhakatange/consumer.'

What did I learn that could be used with my learners?

Ko te tino hua i te rangi nei, ko te taupānga Scratch me te pae tukutuku studio.code.org hei waihanga i te kēmu Flappy. Miharo ana te waihanga i taku ake kēmu mō Flappy, ā, kāore e kore, ka rata atu ngā ākonga ki tēnei momo mahi mō te tuhi waehere.

 What did I learn that could improve my confidence, capability or workflow in my personal life?

He tino taonga te whai wā ki te 'kori' me te 'tutu' i ngā taupānga whēnei i a Scratch.  Mōku ake nei, mēnā ka whai wā ahau ki te tutu, ka pakari ake au ki te whāngai i ngēnei rawa ki ngā ākonga katoa.  Engari, ka pai tonu ki ahau mēnā ka ako ahau ki te taha o ngā ākonga.

Hei whakatepe i tēnei pōhi, hei āpōpō ka tū te whakamātautau Kūkara mō tō mātou kura.  Ahakoa te aha, ki te hinga ahau, kua kī taku kete ki ngā rawa o Manaiakalani. Nō reira, tēnā koutou, tēnā koutou, tēnā koutou katoa. 

DFI Kirikiriroa - Te Rā Tuawhitu - 12/07/2021

 

 What did I learn that increased my understanding of Manaiakalani kaupapa and pedagogy? 

Tuatahi ake, me mihi ka tika ki ngā kaihautū i tae-ā-tinana mai i te rangi nei.  Nei te mihi ki a Dave rāua ko Matt. Ka rere hoki ngā mihi ki a Vicki rāua ko Dorothy. E kore rawa te puna a Mihi e mimiti. 

Ko te kupu matua o te rangi nei ko te Ubiquitous, arā, Anywhere, Anytime, Any place, Anyone.

Ahakoa kāore au i te mahi ki rō kura i tērā tau, kua kitea ngā hua o te mahi matihiko i te wā o te mate urutā i te mea i whakaritea ngā kura o aku tama i ā rātou mahi mā te ipurangi, mā ngā Google Meets.

 

   

What did I learn that could improve my confidence, capability or workflow as a professional? 

• Ahakoa i whakamahi ā mātou pīpī paopao i ngā iPapa, he rawe te hoki atu ki te iPapa i te mea i haere mai au i tētehi kura i whakamahi ai i ngā iPapa mō te kura katoa. Nō reira, i āwhina ahau i tētehi o aku ākonga (he tau whā ia) ki te whakamahi i ngā taupānga o te iPapa.
• Ko ngā akoranga katoa mō te Rangitaki, he mea pai mōku.  Koianei te tau tuatahi i whakamahia e au he Rangitaki, nā reira, kua tīmata ahau ki te tiki ake i ngā whakaahua hei png, me te 'embed' i ngā kiriata me ngā Ata Kūkara.

What did I learn that could be used with my learners? 

• Nā taku torona atu ki te Digital Dig, kua waia haere au ki te neke me te nuku o te pukahiko. Ahakoa he matatau rawa aku ākonga ki te whakamahi i tā rātou pukahiko, he mōhiotanga ōku hei tohatoha ki a rātou, whēnei i ngā pokatata ka whakamahia e au.
• He kaha nōku ki te tutu i runga i taku Rangitaki. Heoi anō, e āhei ana au ki te ārahi i aku ākonga kia kounga ā rātou pohi, kia kounga hoki ā rātou tākupu.

 What did I learn that could improve my confidence, capability or workflow in my personal life?

• Ko te akoranga nui e hāngai ana ki te kaupapa o te rā nei, arā, ko te ubiquitous. Nō reira he hiahia nōku kia tīmata ahau ki te kapo i ahau e whakaako ana, ā, ka tohaina ngērā kiriata ki tō mātou paenga Kūkara.  Ahakoa kīhai tātou i aro atu ki tēnei kaupapa, arā, ko te tuku kiriata ki te paenga Kūkara, ka taea e au te kapo kiriata hei rauemi 'rewindable.' Ko te whāinga māku kia tīmata ahau ki te whakaako pāngarau me te kapo i ahau anō.  Mauriora ki a tātou katoa!

My Maps

 He tutu noa iho tēnei. Koianei te māhere tuatahi i whakaritea e au. Mā te mahi, ka ako!

Ngā Rangitaki o ngā Ākonga

 Tēnā koutou katoa

Hīkaka ana ahau i tēnei wā i te mea kua riro mā te nuinga o aku ākonga tō rātou Rangitaki hou! 21/23 i tīmata ai ki te tuku mahi ki tō rātou Rangitaki. E rua e toe mai ana. Mātakitaki mai i tēnei wāhi []😀

DFI Kirikiriroa - Te Rā Tuaono - 25/06/2021

 What did I learn that increased my understanding of Manaiakalani kaupapa and pedagogy? 

Mō te whakangungu o te rangi nei, kārekau he  painga tua atu i te hōtaka o te rangi nei! E kore rawa te puna a Mihi e mimiti ki a Vicki rātou ko Dorothy, ko Keriana!

Ko te kaupapa matua o te rangi nei, ko te whakahonohono. Ko te whakaaro nui o roto, me tohatoha ngā taha e rua. Kārekau he painga mēnā he kaha nō tētehi te tohatoha, heoi anō, he ngoikore tērā atu ki te tohatoha. 

What did I learn that could improve my confidence, capability or workflow as a professional? 

Ngā mea katoa e pā ana ki ngā Paenga Kūkara! I kite maarire ahau i ngā mea hei whakatika whēnei i ngēnei e whai ake nei:

Ko te taha whakanikoniko (appealing):

• Kaua e maha rawa ngā GIFs hei whakaware i ngā ākonga
• Kia rite te hanga o ia ripa/whārangi
• Kia rua ngā momotuhi

Ko te taha aheinga (functionality)

• Kia kaua e neke atu i te toru o ngā pāwhiri

What did I learn that could be used with my learners? 

• Tānga Kūkara = Kua waia haere au ki te whakamahi  me te rau atu i ngā tānga Kūkara ki te paenga Kūkara, ki te Rangitaki hoki. Nā reira, ka tohaina au i tēnei akoranga ki ngā ākonga hei āwhina i a rātou ki te tāpiri ki to rātou rangitaki.
• Ko tētehi tiwhiri pai mō ngā ākonga ko te tiki ake i ngā tānga Kūkara hei png whakaahua i te mea kārekau he tuarongo (background) 

What did I learn that could improve my confidence, capability or workflow in my personal life?

Me tīmata ahau ki whea???

• Te hanga i te paenga Kūkara māmā 
• Te whakarite i ngā pātene hou mā te tānga Kūkara
• Te huri i te URL o ngā ata Kūkara mai i te 'edit' ki te 'present i runga i te paenga Kukara o te akomanga
• Te huri i ngā whakaahua, pikitia hoki hei porowhita
• Te tāpiri i tētehi momo pae (border) mō ngā whakaahua, pikitia hoki

Hei whakakapi ake i te tuhinga nei, me mihi ka tika ki ngā kaihautū o te rangi nei. Koianei te DFI ngangaro rawa atu ki ahau! Nei a kupu whakamiha e rere atu nei.

Multimodal Learning

 Tēnā koutou te pae whakaako

I te wiki kua hori ake nei, i toro atu tō mātou ringa ki te waihanga i tētehi paetukutuku e kiia nei ko te multimodal. Anei ngā kapomata e toru hei whakaatu i te tīmatanga o te paetukutuku nei:

DFI Kirikiriroa - Te Rā Tuarima - 11/06/2021

What did I learn that increased my understanding of Manaiakalani kaupapa and pedagogy? 

Making Learning and Teaching Visible: 

Tuatahi, he huarahi hou tēnei kia huakina ngā tatau o taku ao whakaako me ngā akoranga o ngā ākonga. Ina ka huakina ngā tatau ki te ao, ka riro mā ngā tamariki ngā kōrero whakatenatena i a rātou nō ō rātou hoa, nō tō rātou whānau, nō te kaiako hoki. 

Tuarua, ko tētehi huarahi kia kitea ngā akoranga o ngā ākonga, mā te Rangitaki.  Kāore anō te nuinga o aku ākonga kia tīmata i ngā Rangitaki; engari, ko ngā Rangitaki tētehi huarahi kia kitea ai ō rātou akoranga i te kura.

Tuatoru, i maumahara au ki tētehi kōrero e pā ana ki ngā 'pāwhiri/clicks.' Ina, ka whā, rima, ono rānei ngā pāwhiri, ka ngaro haere ngā ākonga. Nō reira kua takoto te mānuka ki mua i taku aroaro kia whai whakaaro ahau kia kaua e neke atu i te rua, toru rānei o ngā pāwhiri/clicks.

 What did I learn that could improve my confidence, capability or workflow as a professional? 

Multi Modal

Kātahi te kaupapa hou ko tēnei! Ko te akoranga nui mōku, ko te whakamahi i ngā momo rauemi katoa kia tō mai, kia rata mai ngā ākonga ki te ako.  I mua tonu i te rangi nei, i whakamahi ahau i ngā pukapuka pānui me ngā tuhinga a ngā ākonga hei rauemi mō te whakaako pānui. Heoi anō, kua kite ahau i te huhua o ngā rauemi e hāngai ana ki te kaupapa o Multiple Texts me ngā Modes.

Kua kitea hoki i te rerekētanga o ngā whakatakotoranga tawhito/traditional formats me ngā whakatakotoranga huhua/multimodal formats. Kāore e kore, ka rata mai ngā ākonga ki te ako mēnā ka kite ai rātou i tō mātou paetukutuku hou.

Paetukutuku Kūkara

Tapatapahi ana te wāhanga nei mōku! Kua tīmata au ki te waihanga i tētehi paetukutuku Kūkara e ai ki ngā akoranga o Multi Modal, ā, kua tīmata au ki te whakanikoniko i tō mātou paetukutuku ā akomanga nei. Kāore anō ahau kia oti, engari, ki te rata mai ngā ākonga ki tō mātou paetukutuku, ka wani kē tērā.

What did I learn that could be used with my learners? 

1) Me tīmata ahau ki te waihanga tuhinga, ata, hīti rānei nō roto mai i te kopaki/folder!

2) Ka rua, ka tīmata ahau ki te whakamārama me te tohutohu i ngā ākonga kia waihanga hoki i ā rātou mahi nō roto mai i te kopaki.

3) Ahakoa kāore anō mātou kia tīmata ki te whakamahi i ngā Rangitaki, he whāinga mōku kia kite ai ō rātou whānau i ō rātou akoranga i te kura.

4) I te tīmatanga o te tau, i whakaako ahau i ngā ākonga ki te whakarite i ngā tohuwāhi i roto i tētehi tuhinga Kūkara.  Ināianei, he hiahia nōku ki te whakaatu i te aheinga/function i roto i ngā tuhinga Kūkara, arā, ko te 'Show Document Outline' tērā.  He tere ake tēnei aheinga ki te whakarite, ā, mā ngā ākonga hei whiriwhiri i te huarahi pai ake ki a rātou.

What did I learn that could improve my confidence, capability or workflow in my personal life?

Ko te mea nui i te rangi nei ko te rerekētanga o ngā whakatakotoranga tawhito/traditional formats me ngā whakatakotoranga huhua/multimodal formats. Ka pakari ake taku tū i te akomanga matihiko nei ina ka tīmata au ki te whakarite i ngā akoranga i runga i ngā tikanga o ngā whakatakotoranga huhua. Tārewa ake te wā, ka rata mai ngā ākonga ki te ako, te hanga me te tohatoha.

Hei whakatepe i te tuhinga nei, ka rere atu ngā mihi manahau ki te pae whakaako i te rangi nei. Nōku te whiwhi, nō mātou te whiwhi. Paimārire!

DFI Tāmaki Makaurau - Te Rā Tuawhā - 28/05/2021

What did I learn that increased my understanding of Manaiakalani kaupapa and pedagogy? 

1) Tohatoha = Ko te akoranga tuatahi, ko te orokohanganga o ngà pae pàpori i tìmata ai i te tau 2005. I ako hoki ahau i te arià he hiahia nò ngà tàngata katoa ki te tohatoha, e.g. tohatoha kai, tohatoha pànui, tohatoha i ngà piki me ngà heke o ia rà...  Engari, kotahi anake te mea i tìni i te ao hurihuri nei. He nui ngà pae hei tohatoha i ngènei rà, arà, ko te pukamata tèrà, ko te iTiriata tèrà, ko te Messenger tèrà, arà noa atu te huhua o ngà pae pàpori.

2) Puka Kūkara = Kua waia au ki te whakarite i ngà Puka Kùkara engari, nà ngà akoranga o te rangi nei, kua tìmata au ki te tàpiri i ngà whakaahua me ngà kiriata poto (whènei i ngà Gifs). Ko tètehi akoranga hou màku, ka tàpiria he whakamàrama/description kia màrama pai ngà àkonga ki te tikanga o te Puka Kùkara nei.

3) Hāpara Hot Tips = He rawe ngà akoranga katoa e pà ana ki te pae hautù o Hapara i te mea, koia nei te kura tuatahi i whakamahi i te pae Hapara nei.  Heoi anò, ko te hua o te rangi nei, i mòhio ai au kei whea ngà Rangitaki a ngà àkonga, à, i mòhio hoki ahau kei whea ngà tàkupu. Hurei!

4) Google My Maps  = Kàtahi te wheako hou ko tènei! Kàore anò au kia toro atu ki tènei taupànga hei whakamahi i roto i te akomanga.  Heoi anò, ki te haere màtou ki tàwahi, ka whakamahia pea e au a Google My Maps.

My Next Holiday Destination

5) Hìti Kùkara = Wow! Kua tùwherangia òku whatu!  Ko ngètehi o ngà hua mòku, ko te tàpiri i te tapeke o ngà raraunga. Auè te màmà hoki! Tuarua, kua huakina tètehi anò ao mò te tapawhà iti kei te kokonga matau i raro i te cell.  I mòhio ahau inàianei ki te waihanga i tètehi tauira (pattern), à, mà te whakamahi i taua tapawhà iti, ka taea te whakaoti i te tauira whèrà i te whakaraupapa i ngà marama. Nà te tutu hoki, i ako ai màua ko tètehi o òku hoamahi ina ka whakaurungia te tìmatanga o ngà whakareatanga whènei i te 5x1, 5x2, ka taea te rorohiko te whakaoti i te tauira nei.

What did I learn that could improve my confidence, capability or workflow as a professional? 

Kàore e kore, ko te Hapara Hot Tip te taimana o te rà nei.  He mea hou te whakamahi i te pae Hapara nà reira, he màmà ake te toro atu ki ngà rangitaki mènà ka toro atu au ki te Hapara. Hareruia!

What did I learn that could be used with my learners? 

He rawe ngà akoranga mò ngà Hìti Kùkara.  Ko te mea tuatahi ka whakamahia e au ki te taha o àku àkonga, ko te whakamahi i ngà Hìti hei kohikohi raraunga mò ngà mahi pàngarau kua oti i a ràtou mò ia wiki.  Ko te hua, kia kite ai ràtou mènà he kaha nò ràtou ki te ū ki te mahi, kàore rànei.

 What did I learn that could improve my confidence, capability or workflow in my personal life?

I te whakaaro tonu au mènà ka whakamahia ngà Google My Maps mò tò màtou hararei mò te tau 2022.  Ka pai pea kia mahitahi màtou ko aku tama tokorua.  Mà ràtou tètehi wàhi hei whiriwhiri i Rarotonga, mà màua ko tòku hoa rangatira hei whiriwhiri i ngà wàhi pai ki a màua.

Hei whakakapi i te rangitaki nei, e kore rawa e mimiti te puna mihi ki te pae whakahaere o te rangi nei. Tènà koutou katoa!

DFI Kirikiriroa - Te Rā Tuatoru - 14/05/2021

Kia ora anō e kare mā Kotahi te aronga nui o te rangi nei - HANGA, HANGA, Ā, HANGA ANŌ! Hei tīmatanga i ngā tuhinga nei, me mihi ka tika ki a Vicki rātou ko Makaore ko Kerry. Ka mau te wehi o ngā akoranga o te rangi nei, arā, ko te Hanga, ko te Tānga Kūkara, ko te iTiriata, ko te whakarite ngohe i roto i te taupānga Ata Kūkara me te whakaoti i tētehi gadget, Ko Wai Ahau. What did I learn that increased my understanding of Manaiakalani kaupapa and pedagogy? * Ko te Hanga te kaupapa nui o te rangi nei * Ko te whakatenatena i te taha auaha o ngā tamariki katoa tētehi huarahi hei whakarite i ā tātou tamariki mō te ao matihiko nei * Mēnā ka akiaki mātou i ngā ākonga ki te whakapakari i tā rātou taha auaha, ka pakari ake a rātou pukenga mō te mahitahi/collaboration, te whakawhiti kōrero/communicate me te whakaaro hohonu/critical thinking. * Mahia te mahi-ā-ringa, hei aha te ako noa i te pēwhea e mahi ai. * Ko te tino taonga o te rangi nei, me huri ki te reo Pākehā hei whakamārama, ko te experience the learning, not learn about the experience. What did I learn that could improve my confidence, capability or workflow as a professional? * E toru ngā akoranga hei whakaako i ngā ākonga: 1) Ko te whakamahi i te taupānga Tānga Kūkara 2) Ko te hanga i tētehi ngohe Pick-a-Path hei whakarite i tētehi uiui, whakamātautau rānei 3) Ko te whakamahi i te iTiriata hei hanga playlist, kia āhei mātou te mahitahi/collaborate ki te taha o ngētehi atu kaiako. What did I learn that could be used with my learners? 1) Haunga i te whakauru kiriata, ko te Tānga Kūkara tētehi taupānga pai hei āwhina i ngā ākonga ki te waihanga ngohe mō te reo matatini. Kua hangaia e rātou ngētehi panga mā te Tuhinga Kūkara me te Ata Kūkara, engari kāore anō rātou kia whakamahi i te taupānga Tānga Kūkara. What did I learn that could improve my confidence, capability or workflow in my personal life? Ehake i te mea he akoranga mōku ake tēnei akoranga, engari, he tino taupānga te Tānga Kūkara. Kāre anō au kia whakamahi i te taupānga nei i mua tonu i tēnei rangi, engari i kite au i ngā hua o te taupanga mō aku mahi i waho o te kura, arā te whakarite pānui mō te hākinakina nōneke. Nō mātou te maringanui kia whai wā ki te ako i ngā pukenga hei whāngai atu ki ngā ākonga. Nō reira me mihi ki te kaupapa o Manaiakalani ka tika! Kua tō te rā, ka hou te ao!

Tānga Kūkara

Koianei te wā tuatahi ki te whakamahi i te taupānga Tānga Kūkara. Kua kī rawa tōku panepane ki ngā akoranga hou o te rangi nei, nā reira me whakaatu ki te ao ināianei (kei wareware i ahau ngā tohutohu hei tohatoha 😂)

Poho Kereru ana Ahau!

Kātahi anō ahau ka oti i taku Pick-a-Path tuatahi...hūrei! Toro atu ki taku ata Kūkara. Kāore anō au kia mutu, engari ko te mea nui, kua tīmata!

DFI Kirikiriroa - Te Rā Tuarua - 30/04/2021

What did I learn that increased my understanding of Manaiakalani kaupapa and pedagogy? 

Ka tīmata au ki whea??? Kua pahū katoa taku hinengaro i te nui o ngā rawa me ngā akoranga o te rangi nei. Nā reira te mihi manahau ki a Vicki rātou ko Dave, ko Dorothy, ko Makaore. Hei tīmatanga i aku whakaaro mō te kaupapa nei a Manaiakalani, arā, ko te Ako, te Hanga me te Tohatoha, ka whakarārangi ahau i ngā akoranga hou: 

1) Google Meet/Hui Ataata Kūkara = Kua houngia ngā āheinga o te hui ataata Kūkara ki ngā Google Hangouts o mua rā. Pai hoki te kite atu i ngā tikanga/etiquette hei whakahaere i te hui ataata Kūkara ki tō ngā tamariki taha. 

2) Group Meet = I toro atu tō mātou rōpū ki tētehi hui ataata. Ko te hua i puta mai, kaua e whakarite i te hui whēnei ki roto i te rūma ōrite😂 

3) The Manaiakalani Pedagogy = Ko te aronga nui o te whakaaturanga nei ki ahau, ko te RAT. Arā, ko te Recognise/Āhukahuka, ko te Amplify/Whakarahi me te Turbocharge. - Āhukahuka i ngā tikanga whakaako me ngā huarahi whakaako hei painga mō ā tātou tamariki - Whakarahi i ngā tikanga whakaako me ngā huarahi whakaako mā te whakamahi me te toro atu ki ngā hōtaka, taupānga, paetukutuku hoki hei whakaako i a tātou tamariki - Turbocharge i ngā tikanga whakaako me ngā huarahi whakaako kia rata mai ngā tamariki ki te ako, kia ruku hoki ai rātou i ngā wheako hou, i ngā wheako rerekē. 

4) Google Keep = Koianei taku tino akoranga i te rangi nei i te mea kārekau he tangata wareware whēnei i ahau ki te wareware! I mua tonu i te rangi nei, i whakamahi ahau i te taupānga Notes me te whakarite i ngā oro whakaara/alarms kia kore ai au e wareware ki te mahi i ngā mahi. Heoi anō, he nui rawa ngā āheinga o te taupānga Google Keep. 

5) Gmail = I āhua waia ahau ki ngā āheinga i roto i ngā tautuhinga o te Kīmera, engari i ako ai ahau ki te panoni i ngā themes me ngā inbox types. 

6) Calendar = I mua tonu i te rangi nei, i mōhio ai au ki te whakarite i tētehi hui ataata Kūkara mā te maramataka, ā, kātahi ano ahau ka kite i te maramataka o ngā kaimahi o te kura nei. Auē taukuri e! Kīhai au i te mōhio he maramataka tō mātou ngā kaiako. 

7) Taming your Tabs = Koia hoki tētehi o aku tino akoranga i te rangi nei. Kua roa ahau e whakamahi ana i ngā papa mahi/desktops maha rawa, arā, kotahi te papa mahi mō aku māhere, kotahi te papa mahi mō ngā ākonga, kotahi te papa mahi mō Manaiakalani, kotahi te papa mahi mō ngā DFI, ā, kotahi te papa mahi mō ngā rangitaki me ngā paetukutuku āku. Inaiānei, kotahi anake te matapihi e tūwhera ana! Nā reira me mihi hoki au ki taku hoa taupānga a Toby👍 

8) Embedding a Video in a Blog = Ko te akoranga whakamutunga māku ko te whakauru i tētehi kiriata i roto i taku rangitaki. Hareruia🙌 

What did I learn that could improve my confidence, capability or workflow as a professional? 

Ko te hua nui māku, ko te whakauru i ngā kiriata me ngā honongaitua i roto i te rangitaki o te akomanga. I tupu ai te manako kia ako ahau i te neke me te nuku o ngā rangitaki i te mea koia nei te tau tuatahi mōku ki te whakarite i te rangitaki. Heoi anō rā, he hiahia nōku ki te whakanikoniko i te rangitaki o te akomanga kia rata mai ngā tamariki ki tō mātou rangitaki ā-akomanga nei. 

What did I learn that could be used with my learners? 

Kāore e kore ka whakaako ahau i ngā tamariki ki te whakauru kiriata me te whakauru honongaitua i roto i tā rātou ake rangitaki. 

What did I learn that could improve my confidence, capability or workflow in my personal life? 

Ko te hua nui mōku ake ko te taupānga Google Keep. He pai ake tēnei taupānga ki Notes i te mea he maha ngā āheinga i roto i Google Keep. Ko te whāinga māku, ko te whakawhiti i aku Notes katoa ki Google Keep me te maumahara i ngētehi o ngā āheinga o Google Keep. 

 Hīkaka ana te manawa ki te ako i ngā akoranga hou i roto i ngā hui DFI. Ko te wero māku, kia hāpai i te huarahi whakaako o Manaiakalani, arā, ko te Ako, ko te Hanga me te Tohatoha. 

 Kua tō te rā, ka hou te ao☀️

DFI Kirikiriroa - Ko te Rā Tuatahi - 19/04/2021

Nā wai te whakaaro he kai parāoa te mahi i roto i ngā tuhinga Kūkara? I pōhēhē ahau he mahi māmā te hanga tuhinga Kūkara me te whakanikoniko i ngā tuhinga nei. Heoi anō, hei te rangi nei, kua mārama, kua kitea i te huhua o ngā akoranga i mua i ahau! Anei ngā hua me ngā akoranga o te rangi tuatahi mō tō mātou wānanga DFI:

What did I learn that increased my understanding of Manaiakalani kaupapa and pedagogy? 

• Ako, Waihanga, Tohatoha!!! - Kua roa rawa ngā kaiako o Manaiakalani e para ana i te huarahi Ako, Waihanga me te Tohatoha. Heoi anō, me mihi ka tika ki a rātou.  I te rangi nei, kua akongia e au te hanga i tētehi tūmomo graphic/pārongo whakairoiro, kua oti i ahau tētehi pārongo whakairoiro, ā, tārewa ake te wā ka whakaako ahau i ngā tamariki ki te waihanga i tā rātou ake pārongo whakairoiro i roto i te tuhinga Kūkara.
• Tohuwāhi - I te wāhanga kātahi ano ka hipa atu nei, i ako ai ngā ākonga ki te whakauru tohuwāhi i roto i tētehi tuhinga Kūkara. Ināianei, kua whakaatu mai a Dorothy i tētehi huarahi hei whakamahi i ngā tohuwāhi i roto i tētehi Table of Contents. Ko te rerekētanga o āna tohuwāhi ki āku, he tere ake tana huarahi! Me maumahara ahau ki te whakamahi i ngā Headings me ngā Sub-headings i roto i ngā tuhinga Kūkara.

 What did I learn that could improve my confidence, capability or workflow as a professional? 

• Ka tahi, i ako nei au ki te hanga tohuwāhi rerekē, ā, he tere ake ngā mahi hei whakarite tohuwāhi, engari kei roto i tētehi Table of Contents
• Ka rua, i ako anō ahau ki te hanga i tētehi pārongo whakairoiro i roto i ngā tuhinga Kūkara
• Ka toru, kua toro atu, kua mahia hoki te paetukutuku Remove Background.  Ka wani kē te paetukutuku nei i te mea he roa rawa te huarahi i whakamahia e au, arā mā te taupānga Microsoft Publisher me te Ata Kūkara
• Ko tētehi atu akoranga nui mōku, ko te whakamā ake i aku kete Kūkara, arā, cleaning up my Google Drives me te panoni i ngā tautuhi hei tohatoha i ngā tuhinga Kūkara, ata Kūkara, hīti Kukara me ngērā tūmomo tuhinga.

What did I learn that could be used with my learners? 

• He tomina nōku kia whakaako i ngā ākonga ki te hanga i tētehi pārongo whakairoiro mō tō tātou kaupapa o te tau, arā, ko Ngāti Māhanga
• Ka āhei hoki ahau te whakaatu ki ngā tamariki ki te whakarite i tētehi Table of Contents mō ngā mahi o te reo matatini.

What did I learn that could improve my confidence, capability or workflow in my personal life?

• He ōrite ngā akoranga mōku ki ta te taha ngaio i te mea ka whakamahia ngērā akoranga i roto i aku mahi whakahaere tīma hākinakina, mahi hekeretari mō te karapu nōneke me ngā mahi mō tō mātou pā.

Nei te mihi ka rere atu ki ngā kaihautū o te rangi tuatahi nei. Dorothy koutou ko Makaore, ko Rawiri, he mihi mutunga kore!

Kua tō te rā, ka hou te ao!

My First Week at Te Kura Amorangi o Whakawātea 2021

E ora tonu ana au😊  Nōku nei te whiwhi ki te whai i te mahi hou ki te kura nei.  Rua tau ki muri, i toko ake te whakaaro kia whai nei au i te mahi hou; he mahi rerekē ki te whakaako tamariki.  Tāria te wā, i waewae atu au ki Waikato-Tainui hei tutuki i tētehi whāinga ōku, arā, ko te  mahi hei ringa rehe mō te iwi.  Hei tēnei tau, kua riro mai māku tētehi tūranga pūmau ki Te Kura Amorangi o Whakawātea.  Nōku te maringanui.  Anei te neke me te nuku o te wiki tuatahi nei:

KO NGĀ PITOPITO KŌRERO MŌ TE AKO

• E hararei tonu ana tō rātou arero Māori😆
• Ahakoa tō rātou ngoikore ki te kōrero Māori, he whāinga pai tēnei mā rātou katoa
• He akoranga nui kei te haere ki te taha tuhituhi.  Kua kite au i ngā tuhinga i te reo Māori, ā, kāore e kore, he nui ngā akoranga i mua i te aroaro
• I whakamātauria e au ngā tamariki kia kite ai au i tō rātou mōhio ki te mātauranga tau.  Ko te whānui o ngā taumata mai i te kaupae 4 ki te kaupae 6
• E hiakai ana ngā tamariki ki te ako
• E kaingakau ana ki a rātou te tākaro i ngā kēmu e hāngai ana ki te ako, arā, ko te whakamātau i ngā whakarea, ko te kēmu wharewhare hei whakapakari i tā rātou mōhio ki ngā meka matua pāngarau, ko te tātaki kupu, ko te mahi whakarongo hei whakapakari i ā rātou pūkenga whakarongo
• He maha ngā kupu  me ngā rerenga hou hei ako! Koneki, konaka, koraka, wheneki, whenaka, wheraka, teneki, tenaka, teraka, ehake, tatau, huakina, whakangiha, tuhaho, heke rārangi, tukuna au ki te whareiti...

KO NGĀ PITOPITO KŌRERO MŌ NGĀ TAMARIKI

• Nōku te waimārie i te mea he wairua tau, he ngākau māhaki, he kaha nō rātou ki te manaaki i a rātou anō
• Ahakoa tō rātou ngoikore ki te hāpai i te reo kāmehameha nei, kua timu te tai, ā, kāore e roa, ka rumakina te akomanga nei ki te reo o ō tātou tūpuna
• E ai ki ngā kaiwhakaako o te kura nei, he kaha nō rātou ki te whakaahua i ngā tamariki mā te whakamahi i te kupu 'yummy' me te 'delicious.'  Otirā, tokomaha ngā 'yummy' tamariki i te akomanga nei👌 He kaha nō ngētehi ki te toro atu i te ringa āwhina, ki te whakatenatena i ō rātou hoa me te manaaki i a rātou anō

KO NGĀ PITOPITO KŌRERO MŌ TE TAHA PĀPORI O NGĀ TAMARIKI

• Kāore anō au kia kite, kia rongo, kia rangona i te wairua whakaiti, whakaweti rānei i waenganui i a rātou
• Kua whai hoa te nuinga o ngā tamariki i roto i te akomanga
• He pakari nō ngētehi ki te tū ki te kōrero i mua i ō rātou hoa, engari he whakamā tonu te nuinga.  Tārewa ake te wā, ka tū pakari te katoa hei whāriki, hei whakapuaki i ō rātou kōrero hei kai mā tātou!

KO NGĀ PITOPITO KŌRERO HEI WHAKAKAPI I TE WIKI NEI

• Ko te whāinga tuatahi mō te wiki tuarua, kia rite ngā māhere ako, ngā rawa/rauemi hei whakaako i a rātou
• Ko te whāinga tuarua ko te whakarite i ngētehi rauemi i runga i te taupānga Hāpara
• Ko te whāinga tuatoru ko te whakaoti i ngā māhere ako katoa, arā, ko te kaupapa teraka, ko te hauora hoki teraka

Kua tō te rā, kua hou te ao!